Iragarkiak

Informazioa:Zure iragarkia hemen ikusi nahi? Prezio bereziak herri mailako publizitatean.

#txirrinandtweets 1. mahai-ingurua ospatu zen

#txirrinandtweets 1. jardunaldiaAurreko ostegunean ospatu genuen #txirrinandtweets jardunaldien estreneko ekitaldia, eventos.BIKE webgunearekin elkarlanean. Aurreratu genizuen moduan postEuskaltel garaiaz aritu ginen eta solasean Jon Odriozola (Murias taldea), Igor Gonzalez de Galdeano (Euskaltel-Euskadi taldeko manager ohia) eta Arritxu Iribar (Euskadi irratiko kirol kazetaria) izan genituen gonbidatuen artean.

Solasaldia benetan aberasgarria izan zen. Igorrek bizi izandako gauza guztiak gainditzea asko kosta izan zaiola aipatu zigun eta Jon Odriozolari birritan aholkatu zion ez egiteko besteek esaten diotena, berak uste duena baizik. Izan ere dakizuen moduan Jon Odriozolak abentura berriari ekingo dio Continental maila Murias talde berriarekin, eta berak esan zuen moduan, proiektu berri honek nolabait lekukoa hartu nahi dio Euskaltel-Euskadi taldeak utzitako hutsuneari, Continental mailatik abiatuta.

Hiru protagonistek euskal txirrindularitzan dagoen zatiketa eta zenbait kasutan ikusezina azpimarratu zuten. Horri herri txiki bat garela gehituta eta UCIren araudi aldaketak daraman ibilbidea ikusita, euskal proiektu bat aurrera eramatea asko zailtzen duela adierazi zuten. Hori bai, beti ere World Tour mailako talde bat osatzeari dagokionean, izan ere Continental mailako talde bat sortzea askoz errazagoa ikusten baitute.

Goi mailako gizonezkoen txirrindularitzaz gain maila baxuagoez ere aritu ginen, baita emakumezkoen txirrindularitzaz ere. Azken honen kasuan Arritxuk Emakumeen Biran izan zen ikuslego maila kaxkarra nabarmendu zuen. “Auzo-lotsa” terminoa erabili zuen kazetariak euskal zalegoa munduko onena ezbaian jartzeko.

Esan bezala, asko eta gai ugari izan ziren egungo euskal txirrindularitzaren inguruan jorratutakoak lehen #txirrinandtweets mahai-inguruan. Gure asmoa eduki horiek blogean eta seguruenera podcastetan banatuta lantzea izango da.

Eskerrik asko gure partetik etorri zineten guztioi, bereziki Igor Gonzalez de Galdeanori, Jon Odriozolari eta Arritxu Iribarri. Hurrengo mahai-ingurua antolatzen dugunean jakinaraziko dizuegu.

#txirrinandtweets jardunaldiak: postEuskaltel garaia

#txirrinandtweets : postEuskaltel

Tropela Elkarteak eventos.bike webgunearekin elkarlanean, #txirrinandtweets jardunaldien lehen edizioa antolatu dugu, txirrindularitzarekiko dugun pasioaz gozatzeko ilusioz jaio den ekitaldi fresko berria. Lehen edizio honetan, Euskaltel-Euskadi talderik gabeko lehen denboraldia amaitu berri den honetan, euskal zalegoa biltzeko gai zen proiekturik gabeko denboraldia pasa ondoren, balantzea egin nahi dugu, euskal txirrindularitza profesionalaren etorkizunaz aritu eta Jon Odriozolaren (Murias Taldearen kirol zuzendaria), Igor Gonzalez de Galdeanoren (Euskaltel-Euskadi taldeko manager ohia) eta Arritxu Iribarren (Euskadi Irratiko kazetaria) iritziez gain, biltzen garen guztionak jaso nahi ditugu.

Eguna: abenduaren 11
Ordua: 19:00
Lekua: Keler aretoa – Ramon Maria Lili 2 kalea, 20002 Donostia

Sarrera doakoa da eta guztiok zaudete gonbidatuak. Edukiera kontuengatik, ordea, konfirmazioa eskatzen da. Izena emateko formulario hau bete.

Ekitaldian izateko aukerarik ez baduzu, #txirrinandtweets traola jarraitzeko aukera izango duzue, baita zuen iritziak eta galderak Twitter bidez bidaltzeko.

#txirrinandtweets-en lehen edizioan elkar ikustea espero dugu!

Ivan Velascoren agur eskutitza

2014_Ivan_Velasco_agurraUrtea gogorra izan da niretzat. Oso zaila egin zait ikustea urteak aurrera egiten zuela eta ezin izango nuela berriro ere lehiatu. Baina horrela izan da. Mokorreko lesioa, hasieran onartu nahi nuena baino larriagoa izan da. Nire ibilbide profesionalean zehar hainbat lesio izan ditut, eta azken hori ere aurrekoak bezalakoa izango zelakoan nengoen. Errekuperatu eta berriro ere ehuneko ehunean izango nintzela uste nuen. Zoritxarrez, ez da horrela izan, eta izugarri kostatu zait hau onartzea. Baina, behin irakurri nuen bezala, “denborak ez du ezer sendatzen, gauzak aldatzen ari direla konturarazten dizu eta hori onartu besterik ez daukazu.” Eta hemen nago, lerro hauen bitartez, txirrindulari profesionala izatea amaitu dela onartzen.

Azkeneko urteetan, txirrindularitza guztia izan da niretzat. 20 urte nituela, nork esango zidan niri hau guztia bizi ahal izango nuela. Izan daitezkeen lasterketarik onenak disfrutatzeko eta sufritzeko aukera izan dut, herrialde askotara bidaiatzeko aukera izan dut, baita toki horietako kultura ezagutzeko ere bai. Pertsona zoragarriak ezagutzeko aukera izan dut, baita hain zoragarriak ez zirenak ere. Egindakoa baino gehiago egin ahal izan dudalako sentsazioarekin gelditzen naiz; ez dut nire burua engainatu nahi, baina baliteke lesioak eta lesioek sortzen zidaten konfiantza falta izatea nire oztoporik handienak.

Hala eta guztiz ere, atzera begiratzean irribarrea datorkit aurpegira, bizi izandako unerik onenak etortzen zaizkit burura. Zerbait maitatzen duzunean gertatzen diren gauza txarrak erraztasunez ahazten dituzula uste dut, eta horixe bera da txirrindularitzarekin gertatzen zaidana.Bizimodua aldatzeko garaia iritsi zait eta garai berri horiek ekarriko dizkidaten gauzez disfrutatzea; nahiz eta, barne-barnean, beti txirrindulari sentituko naizela pentsatu.

Oso itsusia izango zen agur esatea nire ametsa egia bihurtzen lagundu didaten pertsonei nire eskerrik zintzoenak eman gabe. Baliteke norbait ahaztea, beraz aldez aurretik hor doa nire barkamena.

Ezer eta inor baino lehen nire familiari: Susana, Nora eta Beñat; eskerrik asko nire ondoan beti izan zaretelako eta ni aguantatzeagatik. Nire lagunei—eurok badakite zeintzuk diren—, emandako animo guztiengatik. Jon Odriozolari, Orbea taldean aukera eman zidalako eta nigan beti sinesteagatik. Miguel Madariagari, etxeko taldean pasa izandako urte zoragarriengatik. Caja Rural Seguros RGA taldeari, azken aukera emateagatik eta azken urte honetan erakutsi duen pazientziagatik. Ibilbidean zehar izan ditudan mekanikari, masajista, zuzendari, taldekide eta zale guztiei. Txirrindularitzari, pertsona gisa hazteko aukera emateagatik eta Markel, Amets, Galdos, Rome, Josu L., Josu A. edo Haimar bezalako pertsonak nire bizitzan jartzeagatik, elkarrekin bizi izandako momentuei esker nire familiakoak bihurtu direlako. Badakit, bai, txirrindularitzatik kanpo ere hor izango direla.

Ezagutzen nautenek badakite gauzak gehiegi pentsatzen ditudala, baina ez, oraingoan ez da horrela izan. Gutuna nostalgikoa dirudien arren, ez nago triste, nire bizitzaren etapa oso garrantzitsu bat gogoratzen aritu naiz, eta oroitzapen horietan bihotza izan dut gidari, besterik ez.

Besarkada bat

Errepideetan ikusiko gara!

Ivan Velasco

Cycling Party, Euskal Herrian jaiotako txirrindularitza mahai-jokoa

Cycling Party

Erasoak, sprintak, mendateak eta abar luze bat, eta azken batean, txirrindularitza estrategia bere osotasunean. “Txirrindularitza mahai-jokorik errealena”, horixe da Cycling Party proiektuaren aurkezpen txartela. Bi gasteiztarrek sortutako jokoa da, atzetik sormen lan-handia bildu duena, hobekuntza urte askoren ondoren. Orain ia hilabete martxan jarri zuten crowfunding kanpaina erabat arrakastatsua izan da (norbaitek ale bat eskuratu nahiko balu oraindik garaiz legoke), eta horrenbestez, garai batean lagunarteko etxeko jokua izandakoak argia ikusi ahal izango du azkenik.

Diego eta Leandro dira istorio polit honen erantzuleak. Cycling Party-ren xehetasunak hobeto ezagutu asmoz, Leandrorekin egon gara solasean.

Gehiago irakurri

Amaitu da 2014ko Tropelaren denboraldia, inoiz baino irabazle gehiagorekin

Tropela.netAurtengo denboraldia berezia izan da, izan ere Tropelan 10. urtez Tourra lehiatzeko aukera izan baitugu aurtengo edizioan. Oraindik argi dugu gogoan Tropelaren hastapen egun haiek!

Denborak aurrera egiten jarraitzen du eta aurtengoan inoiz baino garaile gehiago izan ditugu Tropelan. Alde batetik, lehiaketa gehiago izan ditugulako: 21 lehiaketa izan dira aurtengoan, iaz, aldiz, hamar besterik izan ez zirenean. Iaz baino 11 garaile izan ditugu, beraz, aurtengo urtean. Baina ez horregatik bakarrik, izan ere, aurtengoan sailkapen gehiago izan dira. 21 lehiaketetako sailkapenez gain, Urtekoa ere izan dugu aurreko edizioetan bezala; baina Urtekoaz gain urtekoak izan diren beste sailkapen batzuk izan ditugu: Itzuli Handien sailkapena, Itzuli Txikien sailkapena, Klasikoen sailkapena, Emakumezkoen sailkapena eta Euskal Herriko (EH) Koparen sailkapena. 5 sailkapen gehiago, 5 irabazle gehiago. 27 dira aurten irabazleak Tropelan, meritu handiz, milaka erabiltzailez osatutako sailkapenetan lehenak izateko gai izan direnak. Honatx guztiak:

Gehiago irakurri